Studentët e Fakultetit Ekonomik, të udhëhequr nga asistenti z. Besnik Avdiaj, realizuan sot një vizitë studimore në VentureUP, qendrën e inovacionit dhe ndërmarrësisë të Universitetit të Prishtinës.

Gjatë kësaj vizite, studentët u pritën nga z. Mentor Rexhepi, Drejtori Ekzekutiv i VentureUP, i cili iu mbajti një ligjëratë frymëzuese mbi ndërmarrësinë dhe procesin ndërmarrës. Ai ndau njohuri të vlefshme mbi rëndësinë e testimit të ideve të biznesit dhe sfidat me të cilat përballen startup-et, duke ofruar këshilla praktike për tejkalimin e tyre. Studentët u njohën edhe me aktivitetet dhe mundësitë që ofron VentureUP për zhvillimin e ideve inovative, të cilat krahas ofrimit të zgjidhjeve për problemet e shoqërisë, kanë potencial për rritje të shpejtë dhe të qëndrueshme biznesore.

Kjo vizitë ishte një mundësi e shkëlqyer për studentët e vitit të dytë dhe të tretë, për të fituar përvoja të reja dhe për të kuptuar më mirë botën e ndërmarrësisë. Vizita shërbeu si një përvojë e rëndësishme për lidhjen mes teorisë akademike dhe praktikës në ekosistemin e startup-eve të Kosovës.

Fakulteti Ekonomik mbetet i përkushtuar për të ofruar përvoja praktike që pasurojnë njohuritë dhe aftësitë e studentëve, duke i përgatitur ata për sfidat e tregut të punës dhe zhvillimin profesional.