Fakulteti i Ekonomisë, në bashkëpunim me Rrjetin Ballkanik për Gazetari Hulumtuese (BIRN Kosova), organizoi një ligjëratë interesante dhe edukative për studentët e fakultetit në lidhje me pastrimin e parave.

Arton Hajdari, trajneri i certifikuar i hetimeve financiare dhe pastrimit të parave i ftuar për këtë ngjarje, ofroi një pasqyrë të detajuar mbi metodologjitë dhe teknikat që përdoren në hetimet e pastrimit të parave. Ligjërata u fokusua në kuptimin e pastrimit të parave – elementet themelore të parandalimit dhe analizimit, kërkesat e standardeve ndërkombëtare dhe atyre ligjore në Kosovë, tipologjitë/indikatorët më të shpeshtë të pastrimit të parave, aktivitetet kriminale që i paraprijnë pastrimit të parave dhe sektorët më të cenueshëm, pasojat/efektet e pastrimit të parave, si dhe teknikat e analizës financiare të pasurisë neto.

Studentët e pranishëm kishin mundësinë të njiheshin me procedurat dhe sfidat e hetimeve financiare, si dhe të diskutonin pyetje dhe shqetësime të lidhura me këtë fenomen të dëmshëm për ekonomitë dhe shoqëritë globale. Ligjërata ofroi një mundësi të shkëlqyer për të pasuruar njohuritë e studentëve në një fushë të rëndësishme dhe shumë aktuale të financave dhe ligjit.