Pesëmbëdhjetë studentë të fakultetit tonë sot filluan praktikën profesionale në Zyrën Kombëtare të Auditimit (ZKA), në kuadër të zbatimit të marrëveshjes së bashkëpunimit të nënshkruar vitin e kaluar ndërmjet dy institucioneve. Studentët u mirëpritën nga Zëvendës Auditori i Përgjithshëm, Bezad Halilaj, dhe zyrtarët e tjerë të menaxhmentit të lartë, të cilët i informuan studentët mbi rëndësinë e auditimit publik, rolin e ZKA-së dhe pritshmëritë nga praktika profesionale. Pas prezantimeve hyrëse, studentët nënshkruan kontratat e praktikës, duke zyrtarizuar kështu angazhimin e tyre për tre muajt e ardhshëm. Studentët janë bërë pjesë e ekipeve audituese të ZKA-së dhe gjatë tre muajve do të jenë pjesë e procesit të auditimit në institucionet publike përkatëse, ku do t’i aplikojnë njohuritë e fituara gjatë studimeve. Fakulteti ju uron suksese në praktikën e tyre!